Alþingismenn eiga valkost við guðsþjónustu við þingsetningu

Fréttatilkynning frá Siðmennt:

Löng hefð er fyrir því að setning Alþingis hefjist með guðsþjónustu í Dómkirkjunni. Í ár verður breyting þar á þar sem alþingismönnum sem ekki kjósa að ganga til kirkju munu hafa annan valkost. Siðmennt félag siðrænna húmanista á Íslandi býður alþingismönnum að koma á Hótel Borg áður en þing er sett föstudaginn 15. maí kl. 13:30 og hlýða á Jóhann Björnsson heimspeking flytja hugvekju um mikilvægi góðs siðferðis í þágu þjóðar. Allir alþingismenn eru hjartanlega velkomnir til að eiga stutta samverustund óháð öllum trúarsetningum áður en þeir ganga til þingstarfa.

Um leið er rétt að benda á skrif Illuga Jökulssonar um málið: Heimspekingar eru gagnlegri en prestar.

Við hjá Vantrú vonum að sem flestir þingmenn sjái sér fært að sleppa því að ganga til messu, hvort sem þeir kjósa að fara á fyrirlestur Jóhanns eður ei, enda er þetta ákaflega óeðlileg byrjun á þinghaldi. Það er rétt að taka fram að við gerum engar athugasemdir við hvernig þingmenn kjósa að rækja trú sína, eða trúleysi, þegar það tengist ekki þingstörfum þeirra.