Lög Vantrúar

1. Félagið heitir Vantrú. Heimili þess og varnarþing er í Reykjavík.


2. Tilgangur félagsins er að veita mótvægi við boðun hindurvitna á borð við trúarbrögð, skottulækningar og gervivísindi og að vinna gegn áhrifum þeirra í samfélaginu.


3. Tilganginum hyggst félagið meðal annars ná með því að stuðla að gagnrýninni umræðu um baráttumál félagsins og halda úti vefriti.


4. Félagið er opið trúleysingjum og þeim sem hafna yfirnáttúru, samþykki þeir að vinna að markmiðum félagsins, hlíta lögum þess og séu orðnir fullra 18 ára. Ritari tekur við umsóknum og ber þær undir stjórn. Stjórnin ákveður svo, að höfðu samráði við aðra félagsmenn ef þörf krefur, hvort umsækjandi er samþykktur inn í félagið.


5. Á aðalfundi er kosið í stjórn félagsins sem skipuð er þremur félagsmönnum. Það eru formaður, ritari og gjaldkeri. Þeir eru kosnir til árs í senn og er hver kosinn sérstaklega. Nú hefur formaður setið í fjögur ár samfleytt og skal hann þá ekki gefa kost á sér til embættisins næstu tvö ár hið minnsta. Firmaritun félagsins er í höndum stjórnar. Geti stjórnarmeðlimur ekki sinnt hlutverki sínu til lengri tíma skal stjórn finna staðgengil fyrir hann.
   
   Stjórnarmeðlimir skulu aðstoða hver annan eftir bestu getu en hafa þó hver sitt hlutverk:
   
   
   a) Formaður stýrir starfi félagsins og reynir að ná samhljóm meðal félagsmanna um stefnuna. Hann er einnig aðaltalsmaður félagsins út á við.
   b) Ritari sér um félagaskráningu, ritar fundargerðir stjórnarfunda og birtir félagsmönnum. Hann ber ábyrgð á því að lög félagsins séu rétt uppfærð á vefsíðu félagsins. Hann gegnir hlutverki formanns í forföllum.
   c) Gjaldkeri sér um fjármál félagsins og hefur prókúru fyrir það.
   
   Stjórn skipar ritstjóra vefritsins, einn eða fleiri.


6. Reikningsár félagsins er almanaksárið. Stjórnin ber ábyrgð á starfsemi félagsins milli aðalfunda. Stjórnarfundur er löglegur ef hann situr meirihluti stjórnarmanna. Meirihluti stjórnar getur skuldbundið félagið fjárhagslega á grundvelli bókaðra samþykkta á stjórnarfundi. Meiriháttar fjárfestingar skulu þó bornar undir aðalfund eða almennan félagsfund.


7. Aðalfundur fer með æðsta vald í málefnum félagsins. Til hans skal boðað með minnst 7 daga fyrirvara. Á aðalfundi hefur hver félagsmaður 1 atkvæði. Aðalfundur er löglegur ef löglega er til hans boðað. Hann skal haldinn í janúarmánuði ár hvert. Á dagskrá aðalfundar skal vera:
   
   
   
   1. Kosning fundarstjóra og skoðunarmanns reikninga.
   2. Skýrsla stjórnar um starf félagsins á liðnu ári.
   3. Endurskoðaðir reikningar félagsins lagðir fram.
   4. Lagabreytingar.
   5. Stjórnarkjör.
   6. Félagsgjöld næsta ár ákveðin.
   7. Önnur mál.
   
   Aukaaðalfund skal boða svo fljótt sem unnt er, ef formaður, meirihluti stjórnar eða a.m.k. fimmtungur félagsmanna æskir þess og leggur fram tillögu að dagskrá.
   Aðalfundi er stjórnað samkvæmt fundarsköpum félagsins


8. Rekstrarafgangi/hagnaði af starfsemi félagsins ráðstafar stjórn þess með tilliti til markmiða þess, sbr. 2. og 3. gr.


9. Þessum lögum má breyta á aðalfundi með samþykki einfalds meirihluta. Komi fram tillaga um að slíta félaginu skal farið með hana eins og lagabreytingartillögu. Þó fæst hún eigi afgreidd nema a.m.k. fjórðungur félagsmanna mæti til aðalfundar og 2/3 samþykki hana. Ef ekki næst tilskilin fundarsókn skal boða til framhaldsaðalfundar um tillöguna innan mánaðar. Sá fundur getur afgreitt tillöguna án tillits til fjölda fundarmanna. Verði félagið lagt niður skal á sama fundi ráðstafa eignum þess í samræmi við tilgang félagsins.
   
   Breytingar á lögum þessum skulu öðlast gildi við lok viðkomandi aðalfundar þ.m.t. framhaldsaðalfunda ef þörf krefur. Fundurinn getur þó ákvarðað að lagabreytingartillaga, hljóti hún engin mótatkvæði, komi til framkvæmda þá þegar á þeim fundi.