Ágústínusarverðlaun Vantrúar 2010

Blaðamaður DV leitaði eftir áliti Árna Svans varðandi uppsteit færeyska þingmannsins Jenis av Rana sem neitaði að sitja við sama borð og Jóhanna Sigurðardóttir, forsætisráðherra, sökum þess að hún væri samkynhneigð. Árni Svanur kom því til skila að ríkiskirkjan sé ekki á sama máli varðandi samkynhneigð og sumir frændur okkar í Færeyjum:

Í gegnum niðurstöðu kenningarnefndar kirkjunnar, sem fjölluðu um þessa texta og fleira, er það afstaða kirkjunnar að þeir eigi ekki við í dag. Þeir fjalla um fornan átrúnað en að þeir eiga ekki við um samkynhneigð í samtímanum og þeir eiga ekki við um samvist eða hjónaband samkynhneigðra #

Þann 1. október var mótmælt fyrir framan Alþingi. Mótmælin voru svo svakaleg að ein rúða var brotin í Dómkirkjunni þar sem þingmenn sátu og hlustuðu á kjökrið í biskupnum. Hallgrímskirkjupresturinn ræddi um þetta uppþot, þar sem hann hafði meðal annars þetta að segja:

Við Íslendingar höfum haft þann skilning frá öndverðu að landslög og guðslög fari saman og vinni saman. Við teljum okkur forystuþjóð í skilningi laga, réttlætis og framkvæmd hvors tveggja. #

Viðbrögð Bjarna Karlssonar við ýmsum málefnum eru á ýmsa lund og oft furðuleg. Í raun geta þau verið svo absúrd að einu réttu viðbrögðin er hrista hausinn yfir glóruleysinu. Þegar Geir Waage sagði að þagnarskylda presta væri æðri en landslög urðu margir gáttaðir á þeirri afstöðu. Líklegt þykir að Bjarni Karlsson hafi verið svo gáttaður að hann vissi ekki einu sinni hvað hann átti að segja en fann sig knúinn til að skilja eftir sig þessa fínu dellu:

Trúðverðugleiki kirkjunnar sem varnarþings mennskunnar í veröldinni er í húfi í máli sem þessu. #

Smaladóttirinn Hildur Eir notaði predikunartíman sinn þann 18. apríl til að ræða um rollur, kindur og allskyns veraldarsauði. Hún kom með ansi skýra greiningu á hegðun og atgervi þessara dýra. Það er ansi augljóst hvað litla sveitastelpan er að reyna segja:

En rollur eru ekki heimskar, þær eru bara dæmalaust sjálfhverfar og agalausar, það er fátt sem reynir meira á þolinmæðina en að reka fé af fjalli, stjórnlaust hleypur það undan manni og getur jafnvel fremur valið að steypast fram af bjargbrún en að fylgja vegi smalans. En það orsakast ekki af heimsku heldur sjálfskaðandi þrjósku og vantrú. #

Einn af ritstjórum DV reyndi að ljúka upp augunum fyrir trúleysingjum varðandi mikilvægi kristni í grunnskólum, að ýmislegt í biblí væri bara alveg gríðarlega nauðsynlegt til kenna börnum ýmislegt er varðar siðferði og góða hegðun. En Jón Trausti virtist vera dálítið leiður yfir því að Íþróttaálfurinn í Latabæ væri töluvert vinsælli en Ésú hjá börnunum og reyndi því að poppa Ésú ögn upp með þessari samlíkingu:

Jesús er Íþróttaálfur andans. #

Skólapresturinn Jóna Lovísa virðist telja að ef alveg rosalega margir trúa sama ruglinu þá hlýtur ruglið að vera satt:

Og eflaust eru þau mörg sem halda því fram að það sé barnalegt að trúa því að Jesús hafi stigið upp til himna og sitji við hægri hönd Guðs. En þessi orð enduróma í kristnum kirkjum dag hvern af vörum milljóna manna. Og merking þessara orða er hluti af leyndardómi trúarinnar. #

Það eru eflaust afar fáir sem deila skoðun fyrrverandi sóknarprestsins Ólafs um trúfrelsi, sem hann útlistaði rækilega í Morgunblaðinu þann 9. júní. Trúfrelsi í hans skilningi virðist felast í því að frjálst er að troða kristinni trú inní leik- og grunnskóla sama hvað allir hinir tauta og raula:

Á Íslandi ríkir trúfrelsi. En varla þýðir það að í kristnu landi eigum við að leggja af alla kristilega tilbeiðslu í leik- og grunnskólum, vegna þess að þar séu einstaklingar, sem fæddir eru inn í annað trúarsamfélag. Jesús gerði engan mun á fólki, hann spurði ekki hvaða trú það játaði. Hann sagði: Leyfið börnunum að koma til mín og varnið þeim eigi… Þar var ekkert barn undanskilið. Geta ung börn, sama hvaða trúfélagi þau tilheyra, haft eitthvað slæmt af því að syngja og biðja til Jesú, barnavinarins mesta? #

Séra Svavar Alfreð Jónsson kom með smekklegan samanburð í páskaprédikun fyrir ári. Hann var að sjálfsögðu ekki að tala um trúleysingja og aðra gagnrýnendur kirkjunnar - sei sei nei - þetta var eflaust bara saklaus útúrdúr:

Við útgöngudyr biðu einkennisklædd börn úr Hitlersæskunni, héldu á körfum og buðu fólki blásýruhylki. Ókeypis.>Börnin með blásýruhylkin eru send á vettvang; úrtöluraddirnar, efasemdirnar, vantrúin. Stanslaus áróðurinn um að manneskjan sé ekkert nema hold, bein og sinar og eigi sér engan tilgang nema þann að fullnægja sínum efnislegu þörfum. Og það sé um að gera að fullnægja þeim sem best og mest og fljótast, því enginn viti hvenær hinn mikli Herra alls, dauðinn, kemur, moldin eignist okkur og hlátrarnir kafni í myrkrum grafanna. #

Séra Þórey Guðmundsdóttir færir okkur vísbendingu um að fjölga megi stærðfræði- og rökfræðikúrsum í guðfræðideildinni þegar hún kemst þeirri stórmerkilegu niðurstöðu að fjórðungur stúlkna að viðbættum fjórðung drengja jafngildi helmingi allra barna. Þrír fjórðu drengja að viðbættum þremur fjórðu stúlkna eru þá sennilega hinn helmingur allra barna! Við þetta má bæta að fréttin um fjölda sveinbarna með nafnið Múhameð var tómt bull.

Núna þegar ég kem aftur til Noregs, þá er ein fyrsta fréttin sem ég heyri í norska ríkissjónvarpinu að fjórða hvert sveinbarn í Osló fái nafnið Múhameð. Sem þýðir hvað? Eru ekki sirka álíka margar telpur sem að fæðast eins og drengir? Er þá um það bil fimmtíu prósent af ungu kynslóðinni í Osló að verða múslímar? #

Séra Örn Bárður, sérstakur baráttumaður sérstakra mannréttinda, situr þessa dagana sveittur á stjórnlagaráði og hamast við að semja nýja stjórnarskrá. Við skulum öll vona að mannréttindakafli nýrrar stjórnarskrár verði saminn meðan Örn Bárður er í kaffipásu miðað við þessa einstaklega nöturlegu sýn hans á minnihlutahópum:

Það hefur alltaf haft kostnað í för með sér að tilheyra minnihlutahópi. Þessi nálgun, „vesalings ég og börnin mín", virkar ekki sannfærandi. Þú verður bara að kyngja því að börnin þín uppgötvi að þau tilheyri minnihlutahópi ef þú hefur valið sjálfum þér og þeim lífsskoðanir minnihlutans. Kristnir menn um allan heim verða að þola hið sama. #